Մուշեղ Թումասյան

Մուշեղ Թումասյանը Կենտրոնի հիմնադիր նախագահն է: 2001-2008 թվականներին զբաղեցրել է նաև Կենտրոնի գործադիր տնօրենի և հետազոտությունների ղեկավարի պաշտոնը: Մինչ այդ աշխատել է ՀՀ կենտրոնական բանկում, ՀՀ ֆինանսների և էկոնոմիկայի նախարարությունում, ԱՄՆ ՄԶԳ ծրագրերում: Զուգահեռաբար իրականացրել է խորհրդատվական աշխատանքներ մի շարք միջազգային կառույցների, ծրագրերի և ՀՀ կառավարության համար:

2008-2011 թվականներին, հրավիրվելով աշխատանքի ՀՀ կառավարություն, զբաղեցրել է ՀՀ էկոնոմիկայի փոխնախարարի պաշտոնը: Այս ընթացքում նա պատասխանատու է եղել երկարաժամկետ տնտեսական քաղաքականության, արտաքին առևտրային քաղաքականության և միջազգային կառույցների հետ փոխհարաբերությունների համակարգման համար: Ի լրումն, մշակել և համակարգել է մի շարք խոշոր ենթակառուցվածքային զարգացման ծրագրեր և բերփոխումներ։ Մշակել և առաջ է քաշել նոր արդյունաբերական քաղաքականության սկզբունքները: Ղեկավարել է ՀՀ-ԵՄ խորը և համապարփակ ազատ առևտրի համաձայնագրի նախապատրաստական աշխատանքները` հանդիսանալով ՀՀ գլխավոր բանակցող:

2012-ից որպես միջազգային խորհրդատու տարածարջանի տարբեր երկրներում իրականացնում է խորհրդատվական ծառայություններ ազգային կառավարությունների և միջազգային զարգացման կառույցների համար՝ հիմնականում տնտեսական քաղաքականությունների, մակրոտնտեսական կառավարման, հանրային ֆինանսների կառավարման, հանրային ծրագրերի և բարեփոխումների մոնիտորինգի և գնահատման բնագավառներում։

Ներկայում մասնակցում է Կենտրոնի առանձին ծրագրերի իրականացմանը՝ միաժամանակ ընդգրկված լինելով մասնավոր ներդրումային ծրագրերի առաջմղման աշխատանքներում։

2012-ից շարունակում է զբաղեցնել Կենտրոնի Խորհրդի Նախագահի պաշտոնը:

Աղասի Մկրտչյան

Աղասի Մկրտչյանը տնտեսագիտական գիտությունների թեկնածու է: Սկզբնական կրթությունը ստացել է Երևանի Ժողովրդական տնտեսության ինստիտուտում: 2008-2010 թվականներին ուսանել է Հարվարդի համալսարանի մագիստրատուրայում:

Մինչ այդ աշխատել է Համաշխարհային բանկում, Միավորված Ազգերի Կազմակերպությունում, ԱՄՆ ՄԶԳ ծրագրերում, ՀՀ ֆինանսների և էկոնոմիկայի նախարարությունում, ՀՀ կենտրոնական բանկում: Ներկայում աշխատում է Համաշխարհային բանկի վաշինգտոնյան գրասենյակում:

2001-ից ի վեր Կենտրոնի հետ է` հանդիսանալով Կենտրոնի զարգացման և առաքելության իրականացման գաղափարների նվիրյալ:

Ելենա Մանուկյան

Ելենա Մանուկյանը տնտեսագիտական գիտությունների թեկնածուի աստիճանը ստացել է Հայաստանի պետական տնտեսագիտական համալսարանում:

1997-ից աշխատում է նույն համալսարանի Տնտեսամաթեմատիկական մեթոդների ամբիոնում, հանդիսանում է այդ ամբիոնի դոցենտ: 2002-ից ընդգրկված է եղել Կենտրոնի տարբեր ծրագրերում: 2011-ից Կենտրոնի Խորհրդի անդամ է:

Արմեն Գրիգորիան

Արմեն Գրիգորիանը գերազանցությամբ ավարտել է Սաքսիոն համալսարանը Միջազգային բիզնես և մենեջմենթ մասնագիտացմամբ, ստացել է Բիզնեսի կառավարման մագիստրոսի կոչում Տվենտեի համալսարանում: Հաճախել է Օքսֆորդի համալսարանի Վոլֆսոն քոլեջի վերապատրաստման դասընթացների:

Կենտրոնին միացել է 2009 թվականին, ընդգրկվելով մի շարք հետազոտական աշխատանքներում, ինչպես նաև ուղղակիորեն ներգրավվել է ծրագրերի մշակման ու ֆինանսավորման հայթայթման աշխատանքներում:

Սոցիալ-տնտեսական հետազոտություններին համատեղ մասնագիտանում է կազմակերպական ռազմավարության և ոչ առևտրային հատվածի զարգացման հարցերում: 2013-ին դարձել է ՏԶՀԿ Ընդհանուր Ժողովի անդամ՝ հանդես գալով նաև որպես Կենտրոնի Զարգացման գծով խորհրդատու:

Կարինե Հարությունյան

Կարինե Հարությունյանը տնտեսագիտական գիտությունների թեկնածու է և դասախոսում է Հայաստանի պետական տնտեսագիտական համալսարանի Տնտեսամաթեմատիկական մեթոդների ամբիոնում: Գիտական թեզը պաշտպանել է 2006-ին Մարդկային զարգացման և տնտեսական աճի կապի մոդելավորման թեմայով:

1998-2004-ին աշխատել է ՀՀ Ֆինանսների և էկոնոմիկայի նախարարության Մակրոտնտեսական վարչությունում: 2007-2016 թվականներին խորհրդատվական ծառայություններ է մատուցել ՀՀ Ֆինանսների նախարարության Ուսուցման կենտրոնում:

Կենտրոնի աշխատանքներում տիկին Հարությունյանը ընդգրկված է եղել հիմնադրման օրվանից` իրականացնելով ինչպես փորձագիտական, այնպես էլ առանձին ծրագրերի կառավարման աշխատանքներ: 2004-ից հանդիսանում է Կենտրոնի Խորհրդի անդամ, իսկ 2012-ից իրականացնում է նաև Կենտրոնի գործադիր տնօրենի պարտականությունները:

Վարազդատ Կարապետյան

Վարազդատ Կարապետյանը սկզբնական կրթությունը ստացել է Երևանի պետական համալսարանում: Այնուհետ, շարունակելով կրթությունը Մոսկվայի Լոմոնոսովի անվան պետական համալսարանում` ստացել է տնտեսագիտական գիտությունների թեկնածուի գիտական աստիճան:

Մշտապես հանդիսացել է Կենտրոնի գործունեության ոգևորիչներից մեկը: Ունի Հայաստանի մարզերում և փոքր բիզնեսի հետ աշխատանքների մեծ փորձ: 2011-ին ՀՀ վարչապետի խորհրդականն էր, իսկ 2012-2014 թվականներին` ՓՄՁ Զարգացման ազգային կենտրոնի գործադիր տնօրենը: Հիմնադրել և ներկայում ղեկավարում է «Տարածքային զարգացման հիմնադրամը» և Գեղարքունիքի Առևտրաարդյունաբերական պալատը: Դասավանդում է Գեղարքունիքի պետական համալսարանում:

Արթուր Նախշիկյան

Արթուր Նախշիկյանը տնտեսագիտական կրթություն է ստացել Երևանի Ժողովրդական տնտեսության ինստիտուտում: 1996-ից 2016 թվականների ընթացքում աշխատել է ՀՀ կենտրոնական բանկում, որտեղ իր աշխատանքային գործունեությունը սկսել է կրտսեր մասնագետից` հասնելով Ֆինանսական վարչության պետի պաշտոնի: 2016-ից աշխատում է “Սևծովյան առևտրի և զարգացման բանկում” որպես խորհրդատու:

2001-2006 թվականներին հանդիսացել է Կենտրոնի Խորհրդի անդամ: 2015 թվականից համալրել է Ընդհանուր Ժողովի անդամների կազմը:

Լիլիթ Հակոբյան

Լիլիթ Հակոբյանը տնտեսագիտական գիտությունների թեկնածու է: Գիտական աստիճանը ստացել է 2018 թվականին Հայաստանի պետական տնտեսագիտական համալսարանում՝ Տնտեսության մաթեմատիկական մոդելավորում մասնագիտությամբ։

Կենտրոնին միացել է 2013 թվականին՝ որպես փորձագետ ընդգրկվելով մի շարք հետազոտական աշխատանքներում։ 2022 թվականից հանդիսանում է ՏԶՀԿ Խորհրդի անդամ: